कोशी अञ्चल मोरङ जिल्ला रतुवामाई ९ मा स्थायी बसोबास गरी बस्ने श्री नरेन्द्रबहादुरले ठकठकिया टोलमा बहुसंख्यामा बसोवास गरी बस्ने दलित, जनजाति तथा अन्य गरिब समुदायका छोराछोरीहरु उज्यालो शिक्षाको ज्योक्तिबाट बञ्चित नहुन भन्ने उद्देश्य राखेर वि. स. २०२२ साल माघ २९ गतेका दिन आफ्ना स्व. मातापिताको नामबाट श्री ताराचन्द्र प्राथमिक विद्यालय स्थापना गरी शिक्षाको लहर फैलाउने कार्यको शुभारम्भ गर्नुभयो । श्री नरेन्द्रबहादुर थापाज्यूले आफ्नो निजी खर्चमा फुसको छानो भएको ५ कोठे काठको भवन निर्माण गर्नुभयो । उहाँको उद्देश्यमा सहायोग गर्ने शिक्षा प्रेमी तथा चन्दादाता स्व. श्री कनकबहादुर थापाले आफ्नो निजी खर्चमा १ कोठे काठको भवन निर्माण गरी विद्यालय सञ्चलन गर्न थप हौसला प्रदान गर्नुभयो । यसरी सञ्चालन हुँदै आएको श्री ताराचन्द्र प्रा. वि.लाई सरोकार राख्ने व्यक्तिहरुबाट सञ्चालन गर्ने गराउने भनी निर्णय पश्चात उक्त विद्याय वि.स.२०२९ सालमा श्री जनता प्रा. वि. ठकठकिया नामबाट जिल्ला शिक्षा कार्यालय मोरङमा दर्ता गरी कक्षा १–३ सम्म अनुमति प्राप्त र शिक्षक दरवन्दी सहित स्वीकृत जनताको सकृयता भएको हो ।